الالتراس اشخاص في زروة شبابهم في بورسعيد
اتسلب من بعضهم حق الحياة عبارة عن جثث
موجودة في مشرحة مستشفى ,هو شاب اجرم لما احب يروح مع فريقه علشان يشجعه كان جزائه
انه اضرب واتبهدل ومنهم اللى رجع في نعشه حتى اتحرم من انه يودع اهله ماكنش يعرف
ان ديه اخر مرة هيشوف امه وابوه واي احد بيحبه ياه تخيل شخص يعمل فيك كل ده , ناس
كتير متعرفش مين هما الالتراس تعرفوا ان اكتر جماعة عرفت تتعامل مع الامن المركزى
مع اقل الخساير في ثورة 25 يناير مش الاخوان ولا 6 ابريل كانوا الالتراس وده ناتج
من استراتيجيتهم مع وزارة الداخلية ,علشان كده بعد اللى حصل في بورسعيد والناس اللى ماتوا من
الالتراس لازم نعرف كل حاجة عنهم من احد اعضاء الالتراس اهلاوى وهو طالب جامعى
ورفض ذكر اسمه واول سؤال نطرحه عليه.
مين
الالتراس؟
هم شباب هدفهم التشجيع لكيان رياضى معين سواء
كان في الكورة او التنس او اي لعبة تانية لكن الكورة هى رقم واحد بنسبة لينا,
بدايتها في مصر 2007 كان عددنا ساعتها 20 واحد وطبعا زى اي حاجة في الدنيا بتمر في
بدايتها بمشاكل كتير منها اتهمنا بالشغب وكمان ان اسرة كل واحد فينا كانت مش متقبلة
فكرة السفر برة مصر علشان التشجيع فعددنا اصبح حوالى 10 افراد ومن خلال ادائنا في
المبارايات وجهدنا الكبير في التشجيع وتفكرنا و دخالات المباريات بدأ ينضم لينا
الشباب من اعمار مختلفة وكمان من مستويات مختلفة وعدينا كل المشاكل و وصلنا الى
عدد كبير جدا في الالتراس اهلاوى دلوقتى.
ايه هو تاريخ الالتراس؟
الالتراس فكرة بدأت في الستينات في ايطاليا و
البرازيل وهى اتعملت علشان اصحاب الدرجة التالتة اللى هى ارخس درجة في الستاد
ومكانها وراء شبكة الملعب اللى هو مكان
ميت خالص يكاد يكون منعدم فيها التشجيع عكس الدرجة الاولى والتانية المرتفعين في
السعر والتشجيع, فاردوا اصحاب الدرجة ديه اللى هما حالتهم المادية متوسطة او فقيرة
ان يحالوا الدرجة التالتة لمنطقة مليانة بالشجيع و الحيوية بتكوين الالتراس.
ازاى بتتجمعوا وازاى بتشجعوا؟
بيكون فيه اجتماع في الستاد في البداية وبنعلن
على الفيس بوك عن المبارة وان احنا هنجمع في قدام مكان معين ومعانا كل ادوات
التشجيع من تونربيطات ونانير والاعلام وندخل الملاعب ونعمل بيروفه على الاغانى
اللى احنا مألفنها من الكلمات والالحان اللى ساعات ممكن ناخدها من اغانى تانية
يونانية او مصرية ولبسين تيشرتات الالتراس اللى بتفق مع مصنع معين يعملها وبتتباع
لاعضاء الالتراس وقبل المبارة بشوية نشجع ومانوقفش لغاية نهايتها.
ازاى بتسافروا برة مصر؟
في البداية بنتفق مع شركة سياحة على خط معين
علشان سفر اعضاء الالتراس وابلاغهم بعدد المسافرين وبندفع نص الفلوس والباقى بعد
ما ناخد الفيزه ولما بنسافر بنتفق مع فندق علشان الاقامة ونروح الملعب علشان التشجيع وهدفنا تشجيع
الفريق حتى يفوز على الفريق المضاد واظهار صورة التشجيع المصرى بصورة حضارية
للعالم كله.
ايه هى مصادر التمويل للالتراس؟
مافيش مصادر تمويل !كل الناس فاكرة ان الالتراس
بياخد تمويل من الكابتن حسن حمدى و الخطيب يعنى من المسئولين اللى في النادى وده
مش صحيح لان من مبادئ الالتراس عدم قبول اى تمويل من خارج الالتراس ,حتى في مبارة
مصر والجزائر اللى كانت في السودان عرض جمال مبارك واحمد عز على الالتراس مبالغ
كبيرة علشان يعمل دخلة لمصر في المبارة جامدة لكن الالتراس رفض الفلوس لان ده
بيتعارض مع مبادئه اما مصاريف السفر فكل واحد متكلف بمصاريف نفسه والتذاكر بتيجى
مخفضه شوية للاتراس.
تعليقك على احداث مذبحة بورسعيد؟
اللى حصل كان مدبر بإحكام كمان الدليل ان باب
الخروج اتقفل قبل نهاية المتش بخمس دقائق حتى الضباط اللى كان واقف عنده ميشى ولما
المتش خلص طبعا من التدافع على الباب ناس ماتوا حتى ان واحد صحبى كان بره لما شاف
الباب مقفول راح علشان يفتحه من التدافع الباب وقع عليه مات واللى مش مات من
التدافع مات من النار الحى اللى كان يتحدف عليا من جماهير بورسعيد او من ضربه بشوم
على راسه او من ضربه بمطاوى اللى كانت معاهم
حتى انا اتشاهدت على نفسى اكتر من ست مرات من بشاعة الموقف وانى فلت
باعجوبه.
بعض الناس بتقول ان اللى حصل كان بسبب
هتافتكم؟
هرد واقول ما طول عمرنا بنهتف وعمرنا ما
اتعرضنا لمذبحة زى ديه كمان اكتر حاجة بتوضح ان احنا مش عايزين اى اشتباكات اننا
معانا اشخاص اعمرهم صغيرة واكيد احنا خايفين عليهم لو اتعرضنا لاى خناقة يعنى
الالتراس اهلاوى رايح علشان يشجع وبس ده حتى اتوستنا اتكسرت يعنى السبب مش الهتاف
.
هل دور الامن كان واضح في الحادث؟
بصراحة كان واضح لدرجة 73 حالة وفاة ومئات
مصابين يعنى قاموا بدورهم على اكمل وجه , امن ايه دول كانوا زى متفرجين على مسرحية
قتل لا كمان هما مساعدين للى حصل واكتر حاجة بتوضح علامات الاستفهام ليه لابواب
اتقفلت وليه الضابط ميشى ومدير الامن كان فين وليه مقبضوش على البلطجية الموجودة
وليه فتحوا الابواب علشان البورسعيدية ينزلوا علينا بطريقة الفزيعة ديه وليه
استنوا لغاية ما بقى عدد اللى ماتوا والمصابين ارتفع ده طبعا بيوضح دور الامن كان
كبير ازاى.
ليه اصراركم للتوجه لوزارة الداخلية في
مظاهرتكم في شارع محمد محمود؟
اولا احنا مش في التحرير ومش احنا اللى
عايزين نقتحم وزارة الداخلية لان دلوقتى كل اعضاء الالتراس اهلاوى اللى مش قادر
يستوعب اللى حصل وفي حالة نفسية سئية للغاية واللى في عزاء اعضاء الالتراس اللى
ماتوا .
الناس شايفة اللالتراس مجموعة متعصبة ايه
رايك؟
كلمة
الالتراس معناها جدا والالتراس اهلاوى معناها اهلاوي جدا وده بيقتصر على تشجيع
الكيان الكيان الرياضى المنتمين ليه وطبعا ده بيوضح الفرق بين اللالتراس والهوليجن
لان الهوليجن جماعة بتكون موجودة بس علشان تعمل خناقة مع الفريق التانى او مع
الشرطة ولو هنقيس التعصب فهما المتعصبين لان زى ما وضحت قبل كده احنا موجودين بس
للتشجيع الحاجة اللى بنحب نعملها معتقدتش ان التشجيع حاجة متعصبة.
يا ترى دور اللالتراس في الثورة كان عامل
ازاى؟
اولا احب اوضح حاجة ان كل عضو في الالتراس
لما كان بنزل ايام الثورة ميدان التحرير وحتى دلوقتى بنزل بصفه الشخصية يعنى انه
مواطن مصري بعيدا عن انه عضو في الالتراس لكنه لما نزلنا في مسيرتين بصفة جماعة
الالتراس كانت الاولى علشان اللى حصل في مبارة كيما اسوان وظلم الداخلية لينا
واخدهم لواحد مننا والتانية علشان الشهيد محمد مصطفى طالب في كلية الهندسة اللى
كانت عضو في الالتراس وديه اقل حاجة ليه اما بخلاف دول فكل واحد بنزل بصفته
الشخصية.
بعض
الناس بتقول ان نزول افراد الالتراس في التحرير بهدف الانتقام من الداخلية
ليس اكثر ايه رايك؟
اولا لو هنتكلم عن الداخلية فالالتراس هما
اول ناس واجهوا اسماعيل الشاعر مساعد اول وزير الداخلية والعادلى في عز ايامهم حتى
ان مرة اسماعيل الشاعر قال للضباط(لميالى العيال ديه) لدرجة ان احنا لما بنيجى
نحضر المباريات بنتفتش تفتيش اكتر من ذاتى وما يحدث معانا ماهو الا رخامة من
الداخلية واللى يثبت ان الداخلية هى اللى عايزة تنتقم مننا الفيديو احداث مبارة
كيما اسوان حصلت فيه الاشتباك بينا وبينهم
في الفيديو اللواء اللى كان واقف ادى امر بضرب فينا في البداية خلاص قبل ما نعمل
اي حاجة بحجة ان احنا بنغنى عن العادلى طيب ايه الجديد ومال العادلى بالداخلية بعد
الثورة طبعا ده بيوضح مين اللى عايزة
ينتقم من مين وكمان احنا ننتقد الداخلية قبل الثورة فمش محتاجين ننزل التحرير
علشانهم وكمان احنا بننزل كافراد مش مجموعة من الالتراس زى ما قولت قبل كده.
هل اتجاهات الالتراس اختلفت بعد الثورة يعنى
بقى يدخل فيها سياسة بجانب الرياضة؟
الحقيقة ان الالتراس قبل الثورة زى الالتراس
بعد الثورة ما اختلفش وان السياسة بعيدة عن الالتراس باعتباره جماعة هدفها تشجيع الفريق الرياضى فقط على
عكس الالتراس في دول تانية زى مثلا ايطاليا فيها الالتراس لياتسوا اللى هما
يساريين اصلا بجانب التشجيع يعنى جمعين بين الرياضة والسياسة ولكن في مصر تشجيع
وبس حتى في اجتماعتنا تبقى عن دخلات المبارة وعن الاغانى مابدخلهاش اي نوع من السياسة .
اكيد القارئ عايز يعرف ليه رفضت ان نذكر اسمك
في الحوار؟
لسبب بسيط جدا ان من مبادئ الالتراس رفض
الاعلام تماما لان هدفه على التشجيع وبس الا اذا حصلت حاجة زى مبارة كيما اسوان
ومحتاجة تفسير فيطلع واحد مننا يوضح الموقف لا اكتر من كده ولا اقل وده لان ساعتها
الناس كانت فاكرنا بلطجية وعيال مش وراها حاجة غير الحالات ديه ممنوع تمام اي لقاء
اعلام لان من الممكن ان يطرد هذا الشخص .
ايه هى الامنيات اللى عايزها تحقق؟
الحمد لله احنا كالالتراس اهلاوي وراء الجون
5000واحد بتمنى ان تفكرنا وهدفنا في التشجيع من الاغانى ورفع الاعلام يوصل لكل
مشجعين الاهلى وفريقنا يبقى اقوى فريق.
اما كمصري بتمنى اولا حق اللى مات
مايضيعش,ضرورة محاسبة الفاعل مهما كان الثمن, ان السلطة تتسلم الى مجلس رئاسى مدنى
والجيش يرجع لثكاناته لان المحاكمات العسكرية انتشرت وديه حاجة انا برفضها وان
مجلس الشعب ياخد دوره الحقيقى في تمثيل الشعب.
بقلم- دعاء جمال
ليست هناك تعليقات:
إرسال تعليق