اتغيرنا يا مصريين

لحظة

ايوة انت, ايوة عايزك تقرأ اللى انا هكتبه ,هتقولى ليه بقى ان شاء الله عايزنى اوجع عينيا واقرأه ايه يعنى اللى هتكتبيه , حاجات بسيطة جدا انا لحظتها وعايزك تلحظها معايا ,وفيه ناس كتير بتعملها من غير ما تاخد بالها,وهى ان احنا بنستخدم الالفاظ العسكرية بمختلف طبقاتنا من اقل مستوى لغاية اعلى مستوى والدليل . 

فاكر احداث حرق المجمع العلمى ,ايوة تمام اللى تقاعس فيها الامن علشان يطفى المجمع ,ادينى قولت تقاعس اول لفظ بهت عليا المهم كنت في المترو وسمعت بنتين بتكلموا عن الاحداث ديه شوف معايا بقى الحوار.

الاولى: شوفتى اللى حصل امبارح الواحد والله زهق.

التانية: اه يابنتى اندلعت الحرائق في المجمع تصورى بسبب المولتوف .

الاولى:سمعت في البداية انه حصل كروفر بين المتظاهرين والامن لغاية ما حصلت الاشتباكات.

التانية:واللى يفور الدم ان كل ده حصل بسبب المناوشات قال ايه,و المشاجرات اللى كانت في البداية علشان الالفاظ اللى كان بيقولها المتظاهرين على المجلس العسكرى.

الاولى:بطريقة ديه المتظاهرين دول هيرجعونا  لايام الانفلات الامنى اللى كان بعد جمعة الغضب .

التانية:فاكرة ديه كانت ايام الواحد كان هيموت من خوفه ساعتها كنت في البيت وبسمع صوت اطلاق الرصاص وغير كده كنت بشوف الدبابة وهى في طريقها لحماية المنشأت .

الاولى:ومين سمعك ده احنا كنا متحصريين من كل ناحية وكل شوية بيان او خطاب ويا ريته يأثر يبقى الحال على ما هو عليه لغاية اخيرا خطاب التنحى ربنا رحمنا منه .

التانية : تعرفى المفروض انهم يهدوا شوية لكن اللى بيعمل كل الاحداث ديه من الاخر فئة مندسة.

طبعا ده مثل من حياتنا الاجتماعية ,طيب ركز كده مع نفسك هتلاقى انك بتستخدمها كتييير ده طبعا لانك بتسمعها كتير في التليفزيون في البيت مع اصحابك  حتى في الشارع اقولك على حاجة بمناسبة الشارع نزلت اشترى خضار زى اي حد واتفتح حوار مع بياع الخضار عن احوال البلد ,الغريبة انه لاقيته بعلق ويقول كل يوم احتكاكات احتكاكات هنخلص من الحالة ديه امتى طبعا انا ساعتها كنت هموت واضحك لان كلمة احتكاكات طلعه منه زى العسل .

حتى الشباب طلعوا نكت وهزروا على وجود الالفاظ العسكرية في الشارع المصرى مثلا المعاكسات بعد الثورة
.
.
.
.
... ... ... ... ـ

ـ أنا مش بتاع “فترات انتقالية”.. أنا بتاع استقرار يا جميل.!!

ــ اموت في الشفافيه.!
.
ــ واحشني و حظر التجول حايشني.!!
.
ــ الشعب يريد رقم تليفونك .!
.
ــ احنا أسفين يا مزه.!!
.
- عاوزك في حوار وطني!
.
ــ والحلو بقى حيّ ولا مطاطي ؟!!
.
ــ أموت في الانفلات الأمني.!!

شر البالية ما يضحك والمثل ده بيطبق على الكلام اللى قاله الشباب.

طيب ممكن نرجع مع بعض كده قبل الثورة ونشوف هل الالفاظ العسكرية كانت موجودة ؟,في الحقيقة لا واللى كان معرفنا بيها الاول كانت نشرات الاخبار اللى كانت بتتكلم عن احداث في فلسطين او العراق او اي دولية فيها احتلال عسكرى او غير مستقرة سياسية ولما كنا بنسمعها كنا بنقول ايه الكلام اللى بيقوله ده ونطريق على المذيعة او المذيع منعرفش انه هيجاى يوم ونتأثر بالالفاظ ديه وتكون داخله في حياتنا اليومية وطبعا ده ناتج عن تعايشنا للاحداث الموجودة .

لكن فيه سؤال بيطرح نفسه ياترى الالفاظ العسكرية هتطور معانا طيب هتطور ازاى؟ بصراحة انا مش عارفة الاجابة وبجد نفسى اعرفها ,حاول تفكر كده وتخيل تطورها هيكون عامل ازاى؟

بقلم-دعاء جمال