انا المظلوم انا الطرف التالت

القلم بدور عليه بقالى اكتر من ساعتين , اعمل ايه ده قلم جميل جدا,دورت فى المكتب فوقه وتحته وجواه ,من الاخر قلبت الاوضه كلها ,قولت اروح اسال اللى في البيت وعرفت ان اخويا بس اللى دخل الاوضة انهاردة ,روحت سالته قالى انهى ده اللى لونه اسود كله ,قولته انت عرفت لونه ازاى وانت مشفتهوش فبل كده,قالى سمعتك بتكلمى عن خطه,قولته ايه علاقة خطه بلونه قالى من الاخر انا مختهوش ,طبعا من كلامه اتاكدت انه اللى خد القلم واتحول الكلام من استفسار الى خناقة وصوتنا بقى عالى, واخيرا ادخل بابا ويا ريته ما ادخل ضحك وقال خلاص يا دعاء تلقيه الطرف التالت هو اللى خده ,طبعا اخويا استغل الفرصة وهرب من قدامى,بس اضايقت جدا مش علشان موصلتش لحل في موضوع القلم ,لكن علشان اي حاجة دلوقتى وراها الطرف التالت شماعة بنعلق عليها كل المشاكل بعد ماكانت في السياسة اهى دخلت كمان بيوت المصريين ويا خوفى من وجودها في الحياة الاجتماعية.

قولت اهدى نفسى شوية وافتح التليفزيون واشوف ايه اخر الاخبار, فجأه لاقيت ادمى على قناة المحور يسرى عبد الرازق واحد من هيئة الدفاع عن مبارك وبتكلم ان مبارك برئ من كل التهم المنسوبة اليه ,ان الشرطة والعسكرية كمان مش هما اللى قتلوا ,وانه زعلان اووى ان اهلى الشهداء مخدوعين لان اللى قتل اولادهم الطرف التالت .يعنى يا صباح الدم الفاير ,لا والله اللى قتل المتظاهرين الطرف التالت طيب الصور والفيديوهات اللى فيها ضرب الرصاص ورش المياه على المتظاهرين صحيح كل ده طرف رابع. وانه احداث كنيسة القديسين اللى اثبت فيها طورت وزير الداخلية (العادلى) وراء الاحداث ساعتها كان الطرف التالت لسه بيبى, سبكوها وقتها وطلع مبارك وقال الكلمتين بتوعه انه قادر يحمى مصر ولازم نتكاتف علشان نقضى على الناس الوحشة ديه ,طبعا المصريين وقتها كانت عاطفتهم بالحزن على الشهداء اللى ماتوا هى الغلابة , ميعرفوش ان حميها حراميها ,كل ده بيتعاد تانى مثلا احداث مجلس الوزراء العسكر سحل البنات والمتظاهرين, وعمل نفسه مش شايف حريق المجمع العلمى مع ان المجمع العلمى داخل حرم مجلس الشعب والشورى اللى فيها اكبر جهاز إطفاء حرائق اللى اتكلف ملايين ,صحيح الجهاز مش قادر يطفى الحريق , واقتحام العسكر الميدان وهدم الخيم , يا جماعة اللى عينكم بتشوفه كله كذب ! .

طيب تجوا نفكر شوية ليه موجود الطرف التالت, فيه احتمالات منها ان مافيش مجرم او فاعل لكل الاحداث اللى حصلت ,او ان الفاعل ده هو اللى في ايده السلطة فاقرب حاجة ليه انه يرميها عل الطرف التالت , او مثلا احتمال تشويه الثورة بعد ما خلت كل المصريين يطالبوا بحقهم حتى المطالب الفئوية ظهرت,وعدم ترك الثوار مطالبهم الاساسية اللى هى عيش حرية عدالة اجتماعية ,وطبعا لعدم تحقيقها حتى الان ,فكان البديل الطرف التالت وهو اللى بتطلب المطالب ,ديه معنى كده ان الطرف التالت اصبح مصري .

في النهاية وجود الطرف التالت ده هزار,وتصديق الناس ليه ده مهزلة لان الابيض والاسود اكيد مختلفين ,زى ما الثوار والبلطجية اكيد مختلفين,لان ببساطة الثائر ده واحد يهمه البلد ومصلحتها, واضح من مطالبة اما البلطجية اكيد عارفين اللى عملهم وعملهم ليه بس مش الطرف التالت هو طرف سجن طره . عارفين ايه اللى يقضى على الطرف التالت ويخليه يسيب مصر ميرجعلهاش تانى , هو ان احنا نبص لاي قضية موجودة باكتر من زواية ونحترم كل الاراء القائمة على وجهة نظر لاننا كلنا مصريين ولان الاختلاف بيولد الافكار والاحسن والاصلح ونقول ساعتها باي باي الطرف التالت.

بقلم- دعاء جمال